La Xunta pola Denfensa de la Llingua Asturiana considera, nun comunicáu de prensa, que les declaraciones de Javier Fernández, secretariu xeneral de la FSA-PSOE “suponen un pasu más na escapada de los dirixentes socialistes asturianos hacia les postures más acérrimes y centralistes” en cuantes a la cuestión llingüística.
Pal colectivu de defensa de los derechos llingüísticos la relación que fizo’l cabezaleru de la FSA ente la defensa de la llingua y oficialidá col nacionalismu y la imposición nun ye entendible sobre manera cuando “esi mesmu partíu defende la oficialidá nos demás territorios billingües del estáu”. Pa la Xunta “l’intentu de confusión ente la protección qu’ellos defenden y la oficialidá que defendemos otros, busca distraer y engañar a la xente”.
La Xunta nel comunicáu de prensa unviáu esti llunes siñala que tán “seguros de que’l Sr. Fernández tien de saber de sobrea que nun ye posible garantizar la sobrevivencia d’una llingua na nuesa sociedá si nun tien validez xurídica y s’iguala en derechos a les otres llingües oficiales. Sábelo bien porque los sos compañeros de partíu n’otres comunidaes defenden la oficialidá de les sos llingües”. El colectivu entrúgase’l porqué de que si Javier Fernández “diz querer tanto a la llingua” puede dexar que’l so usu “seya illegal y ensin validez xurídica”.
La Xunta cita “pa vergoña del Sr. Fernández” la proposición non de llei presentada pol grupu parllamentariu socialista nel Congresu onde se destacaba “La protección e impulso de las lenguas propias de las diferentes Comunidades Autónomas en las que rige un régimen de cooficialidad lingüística no sólo no se ha producido en menoscabo de la lengua común, sino que ha generado una dinámica de convivencia lingüística… Los ciudadanos tienen derecho a usar, de acuerdo con su libre elección y con plena validez jurídica, cualquiera de las lenguas oficiales en todos los ámbitos y tipo de relación”. Pa la organización cívica esta proposición non de llei reflexa “lo que significá la oficialidá” sicasí “Asturies pa los dirixentes socialistes asturianos ye diferente” diz la Xunta Pola Defensa de la Llingua nel so comunicáu.
Pa la Xunta’l “problema” de la FSA ye que tán faciendo de menos a los y les asturianes al nun considerar la so llingua al mesmu nivel que les demás. “Defenden esactamente lo contrario que defenden n’otres comunidaes y eso la xente sábelo”.
La Xunta pola Defensa de la Llingua esplica que se tán negando derechos a una parte de la población d’Asturies cuando la FSA-PSOE ta abanderando bien de derechos pa toles minoríes y non el recorte. La Xunta, p’acabar, pide que la FSA s’axunte a la mayoría d’asturianos y asturianes que ven con normalidá la oficialidá.