La Xunta pola Defensa de la Llingua Asturiana (XDLA) vieno acabante denunciar lo qu’atalanta nun ye sinon un despreciu al asturianu nos presupuestos de Cultura n’Uviéu.
Nuna nota de prensa asoleyada esta fin de selmana, la XDLA denuncia’l determín de PP y Ciudadanos “d’amortizar la plaza de coordinador en Llingua Asturiana na ufierta pública d’empleu del Conceyu d’Uviéu y de quitar la subvención prevista a l’Academia de la Llingua Asturiana” que pala asociación asturiana “ye una demostración de qué clas de política llingüística quieren facer los partíos de la derecha: la del despreciu más absolutu, la de nun gastar un euru nello”.
A la manera de Mariano Rajoy, “que nun anulaba la Llei de Memoria Histórica, pero que nun ponía nin un céntimu pa dotala de recursos, la derecha provinciana d’Asturies presenta toa enchipada los sos presupuestos de Cultura inorando dafechu l’asturianu, anque pa los poderes públicos haya una obligación por llei de velar por esi patrimoniu cultural”.
Na nota de prensa, la XDLA entrugase retóricamente si “¿daquién pue figurase al Partíu Popular y a Ciudadanos poniéndose d’alcuerdu pa eliminar cualquier tipu d’ayuda al gallegu na capital de Galicia? Eso n’Asturies ye posible. La incultura y l’autoodiu de la derecha local fai posible eso y muncho más”.
Lo pior ye que “puen subvencionase les orquestes, la zarzuela, la ópera, el cine, el teatru, la poesía, la cerámica —bien fecho—, pero destinar recursos pa la única realidá cultural propia y diferencial d’Asturies, pa la que ye menester polítiques decidíes d’apoyu… non, pa eso non”, .