La Xunta de Toponimia quier iguar los nomes de llugar ‘in situ’. L’organismu asesor del Principáu, que nun cellebrará la so siguiente xuntanza de trabayu hasta’l prósimu 23 d’agostu por mor de les vacaciones de veranu, plantega facer esa reunión en Llanes, primer conceyu que figura na llista de llabor pendiente de la Xunta, depués qu’ésta emitiera sendos informes sobro los nomes de llugar de Carreño y El Franco.
Nesti sen, la Xunta Asesora de Toponimia del Principáu d’Asturies yá empobinó una comunicación oficial al Ayuntamientu de Llanes pa determinar el llugar de la xuntanza, na que quedará enveredáu l’espediente toponímicu del terceru de los conceyos qu’hasta agora solicitaron la intervención del organismu asesor pa recuperar los sos nomes tradicionales de llugar n’asturianu.
Depués de Carreño y El Franco, cuya toponimia yá ta revisada, y de cellebrar la so prósima reunión en Llanes, la Xunta habrá iguar los nomes de llugar de Llangréu, L.lena, Castrillón, Xixón, Ayer y Siero, municipios que completen de momentu la llista de nueve conceyos que pidieron formalmente recuperar los sos topónimos tradicionales.
Esi númberu acércase al másimu a les propies previsiones del director de la Oficina de Política Llingüística del Principáu, Ramón d’Andrés, qu’albidraba qu’una decena d’ayuntamientos solicitaría la intervención de la Xunta de Toponimia nos sos respectivos ámbetos pa finales de xunu pasáu.