La Xunta considera que l’informe del Conseyu Consultivu ta llenu de tópicos y prexuicios

Énte les noticies qu’a lo llargo d’estos díes foron adelantando los medios de comunicación sobre’l conteníu del informe del Conseyu Consultivu sobre la reforma del Estatutu asturianu, la Xunta pola Defensa de la Llingua manifestó públicamente’l so malestar polo qu’esti documentu que tachen de ‘prexuiciosu y faltu d’argumentaciones xurídiques’ trata no tocante a la oficialidá de la llingua asturiana.

Nun comunicáu fechu públicu ayeri pola Xunta pola Defensa de la Llingua Asturiana, la organización cívica de defensa de los derechos de los asturianofalantes amosóse más que preocupada poles opiniones vertíes nel informe del Conseyu Consultivu no tocante a la regulación de asturianu nel prósimu Estatutu d’Autonomía.

Considerándolu como una ‘coartada del presidente Areces pa xustificar les sos posiciones ideolóxiques’, la XPDLLA llamenta qu’una ‘serie d’opioniones s’amazcaren dientro d’un informe xurídicu’. ‘Un informe d’esti tipu’, sigue’l comunicáu, ‘tien que falar de posibilidaes tecniques, de desarrollos llegales, d’implicaciones xurídiques, pero non de los prexuicios y los mieos que puedan tener les persones que formen el Conseyu Consultivu’.

La XPDLLA ve esmolecedor esti informe al qu’acusen de cayer ‘en tópicos tan mansuñaos como que l’asturianu nun tien unidá, como qu’una parte pequeña de la sociedá veríalo como ‘puro artificio’, o dicir, contra la realidá sociollingüística y xurídica del Estáu español, que tien que venir enantes la normalización social pa depues facer la normalización xurídica’.