La XDLA esixe al Conceyu d’Avilés que respete la toponimia oficial

Depués de la remodelación que’l Conceyu d’Avilés ta faciendo d’ún de los barrios más céntricos d’Avilés, Les Meanes, l’alministración local acaba d’axudicar el proyectu p’asitiar una estructura de 15 metros de llargor que va acoyer los servicios de tresporte d’autobuses de la zona. El diseñu de la marquesina, de la empresa checa de MMCITÉ + A.S., tamién contempla recoyer unes lletres col nome del barriu avilesín. Sicasí, el proyectu nun recueye’l nome oficial del barriu, Les Meanes/Las Meanas, aprobáu col preste del Gobiernu d’Avilés nel 2009 y del Gobiernu d’Asturies nel 2010. El diseñu de la empresa checa namás va tener la opción Las Meanas, forma única que yá nun existe legalmente.

Por too eso, la Xunta pola Defensa de la Llingua Asturiana (XDLA) esixe al Conceyu d’Avilés qu’ordene modificar el diseñu orixinal pa que la marquesina cumpla cola llegalidá en materia toponímica, recoyendo la forma Les Meanes o, nel so casu, la forma oficial Les Meanes/Las Meanas. Hai que recordar que’l procesu d’oficialización de la toponimia asturiana tien como fin la recuperación d’estos nomes, polo que nun vemos meyor forma de visibilizar y poner en valir el nome tradicional del barriu qu’asitiándolo nuna de les zones más transitaes de la ciudá.

Otra manera, la organización espera que les pantalles que se van instalar na mesma infraestructura colos horarios de los servicios d’autobús tamién respeten los nomes oficiales de los llugares d’Avilés. La XDLA recuerda que’l procesu de recuperación de la toponimia, onde participen espertos y vecinos y que surde por mor del consensu políticu y social, tien como fin que los nomes oficiales nuevos aparezan en tolos documentos y nos carteles indicadores, lo contrario sería dir contra la llexislación vidente.