La Xunta pola Defensa de la Llingua Asturiana entama con una caravana de coches pola oficialidá pel valle del Nalón que va desenvolvese esti domingu 6 de payares. una serie d’iniciatives ente los ataques que se tán viviendo na normalización social del asturianu.
La Xunta pola Defensa de la Llingua Asturiana (XDLA) ta preparando una serie d’iniciatives ente los ataques que se tán viviendo hacia los pocos avances que se dan na normalización social del asturianu (como los recursos de Delegación del Gobiernu a ordenances y reglamentos, campañes mediátiques contra la recuperación de la toponimia, parálisis na presencia de la nuestra llingua na radiotelevisión pública, etc.).
La Xunta vese na necesidá de responder con actividaes movilizadores pa que la demanda de la oficialidá siga tando presente tol añu, más allá de les feches reivindicatives de siempre. Tamién se busca aprovechar y afitar los llazos de collaboración abiertos colos alcaldes y conceyales que participaron na iniciativa de Conceyos pola Oficialidá.
La primer actividá que se va facer ye esta caravana de coches pola oficialidá pel valle del Nalón el domingu 6 de payares. Va salir a les 10:30 hores de Bimenes, como conceyu pioneru na proclamación de la oficialidá, y va percorrer los llugares de La Felguera, Sama, Ciañu y L’Entregu, p’acabar alredor de les 14:30 hores en Sotrondio.