La XDLA entama una campaña nes redes pa que los asturianos amuesen l’apoyu a la manifestación pola oficialidá que se va celebrar en Xixón el 6 d’abril de forma y manera que los ciudadanos xuban vídeos a les redes dientro de la campaña #OficialidaChallenge.
La Xunta pola Defensa de la Llingua Asturiana (XDLA), dientro de les iniciatives pa visibilizar la manifestación pola oficialidá d’esti 6 d’abril en Xixón -con salida a les 18.00 hores de la Plaza de L’Humedal- entama una campaña d’apoyu a la convocatoria al traviés del retu viral #OficialidaChallenge. El retu consiste en que los usuarios xuban a les redes sociales vídeos curtios animando a la participación na marcha, mostrando’l cariñu pola llingua o diciendo la so palabra favorita n’asturianu o en gallego-asturianu. Amás, van tener que nominar a otres trés persones, que van tener que continuar el retu y asina too siguío.
D’inaugurar esti retu viral va encargase la mesma Pita, la mascota del movimientu de reivindicación, que va principiar la campaña nominando a trés persones mui conocíes de la sociedá asturiana. A partir d’esi momentu, tolos usuarios de les redes sociales -d’Asturies, pero tamién de fuera del nuestru territoriu- van poder mostrar l’apoyu a la convocatoria d’una manera asemeyada. Quier dicise, nun hai qu’esperar a tar nominaos enantes y siempre con videos curtios p’animar a participar qu’han xubise a Twitter, Facebook o Instagram col hashtag #OficialidaChallenge.
Otra manera, pa visibilizar más tovía’l compromisu cola oficialidá y cola marcha del 6 d’abril, la XDLA pon a disposición de tolos usuarios de les redes sociales cuatro modelos de semeyes de perfil pa les redes sociales. Dos n’asturianu y dos en gallego-asturianu, de color azul colos lemes ‘Yo voi’ o ‘Eu vou’ y ‘Ye agora’ o ‘É agora’, qu’inclúin la fecha y hora de la manifestación. Estos van poder usase como imaxe de WhatsApp o de los perfiles personales de Twitter, Facebook o cualesquier rede social y, asina, enllenar les redes de color azul pa mostrar el cariñu pol nuestru patrimoniu llingüísticu.