La Xunta pola Defensa de la Llingua (XDLA) vieno acabante denunciar esti día otru ataque más a la llingua asturiana dientro de la Universidá d’Uviéu, onde l’asturianu desapaez de la ufierta formativa d’idiomes de La Casa de las Lenguas.
Nun curtiu comunicáu asoleyáu esti llunes pela tardi, la organización de defensa del idioma alvierte de que, “sele que sele, siguen les aiciones escontra la cultura asturiana dende que llegó’l nuevu rectoráu al mandu de la Institución académica”.
Dende la XDLA faise un llamáu al nuevu equipu rectoral pa que “dexe de vulnerar los drechos llingüísticos de la sociedá que vienen marcaos nel estatutu d’autonomía, la llei d’usu y promoción del asturianu y los propios estatutos de la universidá”.