Más cursos de llingua asturiana p’atender la demanda de los trabayadores de los medios de comunicación. La Universidá d’Uviéu, en comuña cola Oficina de Política Llingüística, plantégase convocar nuevos monográficos nel segundu cuatrimestre, depués que les 35 places pal primeru de los cursos quedaren cubiertes nos primeros seis díes naturales del plazu de matrícula.
Asina, el periodu d’inscripción abrióse’l pasáu 9 d’ochobre y, depués de rexistrar 15 matrícules na primer xornada, completó les 35 places ufiertaes nel cuartu día hábil pa la matriculación, el pasáu martes. Poro, el cursu de llingua asturiana nel ámbitu de la información y la comunicación, dirixíu por Xulio Viejo, desendolcaráse ente’l 1 d’ochobre y el 13 de payares n’Uviéu y Xixón col aforu completu.
La Universidá y la Oficina de Política Llingüística tendrán una segunda ocasión de valorar l’ésitu de la so convocatoria específica pa formar periodistes nel usu del asturianu a partir del prósimu 29 d’ochobre, día en que quedará abiertu’l plazu pal segundu de los cursos previstos nesti cuatrimestre: un monográficu especializáu en comunicación audiovisual nes situaciones de minorización llingüística.
La conseyera de Cultura, Comunicación Social y Turismu, Ana Rosa Migoya, presentó’l pasáu 9 de setiembre los cursos empobinaos a periodistes como un preséu útil pa capacitar a profesionales qu’usen l’asturianu nos medios de comunicación, un entornu fundamental pal caltenimientu d’un idioma.
Migoya: “Ye una obviedá que l’asturianu tará presente na radio y na televisión autonómiques”