La Universidá d’Uviéu crea la Comisión de Normalización Llingüística del Asturianu

La Universidá d’Uviéu acaba de facer pública la creación d’un órganu que va asesorar al rector en materia d’usu y promoción de la llingua asturiana dientro de la insititución. La Comisión créase col envís de dar calce a les previsiones conteníes nel artículu 6 de los Estatutos, en rellación cola protección y usu de la llingua asturiana. Esta midida obedez, según comenten dende’l Rectoráu “a un compromisu firme contraíu col que se pretende encauzar la demanda d’una parte de la comunidá universitaria, cola finalidá d’impulsar actuaciones asemeyaes a les yá entamaes nos trés últimos años en favor del asturianu”.

El Rectoráu destaca, d’ente estes acciones la posibilidá de presentar escritos ante’l Rexistru de la Universidá en llingua asturiana; la incorporación del minor o la mención d’asturianu nos nuevos graos de Filoloxía y Maxisteriu; l’usu d’esta llingua como preséu de comunicación institucional al traviés de la Web corporativa; o la traducción de determinaos testos al asturianu, ente los que s’inclúi la recién edición de los nuevos Estatutos de la Universidá.

La Comisión va tar integrada pol propiu Rector, Vicente Gotor Santamaría, el Vicerrector d’Informática y Comunicaciones Víctor G. García García, el Director d’Área Aplicaciones de xestión, David Melendi Palacio, la Profesora del Departamentu de Filoloxía Clásica y Románica, Ana María Cano González, el Profesor del Departamentu de Filoloxía Española, Ramón d’Andrés Díaz y los estudiantes Inaciu Galán y González, Javier Cubero de Vicente y Santiago Fano Méndez.