La Universidá d’Uviéu entama pa los díes 14 y 15 de febreru les Xornaes d’Orientación Universitaria “Descubre les tos Facultaes”, dirixíes fundamentalmente a estudiantes de Bachilleratu y Ciclos Formativos de Grau Cimeru (CFGS), coles mires d’informalos sobro la ufierta d’estudios universitarios y l’accesu a la Universidá.
Estes xornaes van desenvolvese nel Palaciu d’Esposiciones y Congresos Ciudad d’Uviéu (na Cai Arturo A. Buylla, 5), n’horariu de mañana pa los estudiantes de Bachilleratu (previa inscripción de los sos respectivos centros) y per les tardes con accesu llibre pa families y p’alumnáu de @4º d’ESO.
L’actu inaugural va ser el martes 14 de febreru a les 9:30 hores, nel auditoriu del mentáu Palaciu d’Esposiciones y Congresos y va tar presidíu pol rector, Santiago García Granda, y va cuntar amás coles intervenciones del conseyeru d’Educación y Cultura, Genaro Alonso: l’alcalde d’Uviéu, Wenceslao López; la directora xeneral d’Universidaes, Cristina Valdés; y la vicerrectora d’Estudiantes, Elisa Miguélez.
El programa de les xornaes inclúi, de 10 a 14:30 hores, les intervenciones de la vicerrectora d’Estudiantes y de directores d’Área de la institución académica, de decanos y directores de distintes Facultaes y Escueles, lo mesmo que de egresaos y responsables d’empreses allugaes na rexón. Les sesiones de tarde van desenvolvese de 17 a 19 hores. Les persones que precisen adaptaciones o servicios especiales, pa un meyor aprovechamientu de l’actividá, pueden contactar cola Oficina d’Atención a persones con necesidaes específiques de la Universidá d’Uviéu-ONEO (@oneo@uniovi.es).