La sección “Alitar Asturies” cumple esta selmana trenta años de presencia n’El Comercio

Entamó pola iniciativa de Conceyu Bable embaxo’l nome d’Estaya Rexonal y dempués d’un tiempu curtiu ensin presencia d’asturianu n’El Comercio, recuperóse col nome col que mos llegó hasta güei, “Alitar Asturies”. Una sección que n’aquel momentu compartía con “La Fueya’l carbayu” de La Voz de Avilés la escasa presencia del asturianu na prensa asturiana.

La sección cumple esta selmana 30 años de presencia ininterrumpida nes páxines d’El Comercio. Trenta años nos que recoyó l’actualidá cultural y política del asturianismu.

La estaya entamó llevándose n’andecha polos miembros de Conceyu Bable, más tarde foi Ramón d’Andrés, que tuvo que dexar la xestión de la sección en manes del so pá, l’escritor yá fallecíu Mánfer de la Llera, pa más tarde llevala los dos a comuña. La sección tuvo unos entamos más políticos y col tiempu garró la forma d’una sección cultural centrada na cultura asturiana y na lliteratura na nuesa llingua.

Les últimes etapes de la sección lleváronles alantre Francisco Álvarez, Xandru Fernández y Enrique Carballeira, responsable actual de la estaya.

La sección inclúi güei dellos artículos remembrando esti anivesariu, escritor por Ramón d’Andrés, Xuan Bello, Berta Piñán y Carlos Rubiera, amás d’una entrevista col ex presidene de l’ALLA, Xosé Lluis García Arias.