La revista “N’Ast. Cartafueyos d’Ensayu” presenta númberu nuevu en Xixón

Esti vienres, 14 d’avientu, va presentase públicamente’l númberu 8 de la revista “N’Ast. Cartafueyos d’Ensayu”. L’actu de presentación, abiertu al públicu, va tener llugar en Xixón, nel Llar Social L’Ayalga (cai Decanu Prendes Pando, 11, baxu), a les 20’00 hores, y nel mesmu participarán tanto miembros de l’Asociación Cultural N’Ast, coleutivu qu’asoleya la revista, como dellos de los autores qu’andechen cola mesma.

Nesta octava entrega de los cartafueyos d’ensayu, pa la que se cuntó col sofitu de la Conseyería d’Educación, Cultura y Deporte, recuéyense los trabayos “Nacionalidá y marxismu. Estratexa y táutica de los pueblos nel so camín haza la lliberación nacional y de clas” (Fonsu Fernández Román); “Gausón Fernande: el paxellu ye símbolu intemporal d’asturianía”(entrevista fecha por José Luis Campal Fernández); “Hestoria d’una espublización nacionaliega: El Fielatu” (Daniel Cueli Canto); “Pregón de la XIII Fiesta de la Oficialidá de la Llingua Asturiana. Bimenes – 2009” (Roberto González-Quevedo González).

Pieslla los conteníos d’esti númberu l’ensayu “Un proyeutu unitariu pal nacionalismu asturianu” (Marcos Abel Fernández Marqués), recuperáu de la revista El Fielatu onde s’asoleyó va venti años. La revista ta dirixida por Daniel Cueli Canto.