Un grupu de sesenta y dos cubanos, emigrantes y fíos d’emigrantes asturianos, son los protagonistes de la Operación Señaldá d’esti añu. La iniciativa del Conseyu de Comunidaes Asturianes cumple la so decimocuarta edición como programa pa facilitar el viaxe y la estancia nel so país a los asturianos del esterior que lleven décades ensin volver.
Cuba, una tierra que foi el destín escoyíu por miles d’asturianos a lo llargo de más d’un sieglu, ye’l país escoyíu nesta ocasión pol Conseyu de Comunidaes pa entamar el so programa Operación Señaldá. El gran númberu d’emigrantes de primera y sucesives xeneraciones, asina como les dificultaes económiques que carez la isla, fueron los motivos deteminantes pa dedicar la edición de 2005 a los asturcubanos.
Miembros de la delegación d’emigrantes manifestaron a los responsables de la Operación Señaldá el so deséu de ver cumplíu un proyectu consistente en traer al nuestru a un grupu d’artistes y músicos cubanos d’orixe asturianu. El caltenimientu de la cultura y el folklor de la so tierra d’orixe en Cuba foi otru de los deseos que los asturcubanos espresaron y el Conseyu de Comunidaes comprometióse unviar a la isla a monitores que pudieren entamar actividaes d’esta mena, como la enseñanza musical de la gaita.