El Serviciu de Mocedá del Conceyu d’Avilés, al traviés de la Oficina de Movilidá Xuvenil Internacional, “Europa Equí”, entama un cursu de formación pa mentores del Serviciu Européu de Voluntariáu.
La figura de mentoría ye fundamental pa sofitar el procesu d’integración local y de siguimientu del aprendizaxe de los mozos voluntarios que lleguen a Avilés procedentes de distintos países del continente.
El cursu va tener llugar el sábadu día 30 de xineru nel edificiu Fueru (C/ Fernando Morán 26). L’horariu va ser de 10 a 14 y de 16 a 20 hores. La inscripción ye gratuita y el plazu pa formalizala remata’l llunes 25 de xineru.
Esta acoyida y acompañamientu a los voluntarios ye una de les funciones de la Oficina “Europa Equí”, que lleva unviando y recibiendo voluntariáu nuevu al traviés del Serviciu de Voluntariáu Européu (SVE) dende l’añu 2006, xestionada pola Asociación Cultural En Construcción.
El cursu ta dirixíu especialmente a persones que participaren nun proyectu de Serviciu Voluntariu Européu” o en dalgún otru proyectu del programa Erasmus+: Mocedá n’Acción¿, pero ta abiertu a cualquier persona comenenciuda en conocer más sobre dichu programa.
Mientres el cursu, les persones participantes van poder familiarizase col programa Erasmus+: Mocedá n’Acción y, más concretamente, con una de les sos acciones principales, el Serviciu de Voluntariáu Européu. Tamién se van tratar el rol de mentoría en proyectos d’esti tipu, delles ferramientes nel resolvimientu de conflictos y l’acompañamientu nel procesu d’aprendizaxe según na ellaboración del certificáu Youthpass. Too al traviés d’una metodoloxía participativa.
Les persones interesaes tendrán de ponese en contactu cola Oficina de Movilidá Xuvenil Internacional d’Avilés “Europa Equí” al traviés de corréu electrónicu europaquiarrobagmail.com.