La obra de Juan Botas esponse na Casa Natal de Xovellanos

El Muséu-Casa Natal Xovellanos acueye hasta’l 25 de setiembre la presentación de la colección de Juan Botas, qu’ufierta una nueva oportunidá d’afondar nos dos visiones d’esti artista, con una selección de les sos principales aportaciones como los decoraos que diseñó pa los platós de la cadena de vídios musicales MTV, exerciciu maxistral d’arquitectura efímera en clave posmoderna, y los sos cuadernos de fueyes plegaes, curdiones que van esbillando una hestoria llena de color ya intensidá.

Juan Botas (1958-1992), nacíu en Xixón, fórmase na School of Visual Arts de Nueva York, onde ye discípulu de Milton Glaser, referente ineludible de lo que ye’l diseñu americanu ente los años sesenta y ochenta. Nel so estudiu, onde trabaya ente 1983 y 1986, Botas desenvuelve’l so propiu llinguaxe gráficu nel que prima la comunicación directa y ensin tópicos.

En 1986 establécese pela so cuenta. Nesta dómina surden nueves temes ya intereses que queden recoyíos nos sos cuadernos, diarios nos que la imaxe sustitúi a la palabra y que constitúin la so obra más inédita. Coles mesmes la so obra gráfica públicase en revistes y periódicos como Newsweek, New York Times, World Report, Vogue, Seventeen….