La solicitú de Faustino Zapico de lleer la so tesis doctoral n’asturianu abrió una crisis dientro del órganu supremu de la Xusticia n’Asturies. Nel añu 2005 Juan Vázquez, rector de la Universidá d’Uviéu, negóse a la inscripción de la tesis del hestoriador Faustino Zapico, porque “nun cabe la igualdá na illegalidá” en referencia a la llingua empleada. Esta situación provocó que Zapico se dirixere a les diferentes instancies xudiciales p’algamar el derechu a poder presentar la so tesis n’asturianu.
La sección tercera de la Sala de lo Contenciosu-alministrativu del Tribunal Superior de Xusticia d’Asturies va decidir si les tesis doctorales se pueden lleer n’asturianu, en concretu aquelles non referíes al ámbitu llingüísticu. Dao que si s’almitieron delles tesis doctorales sobre l’asturianu usando la llingua asturiana como vehículu d’espresión.
El departamentu d’hestoria de la Universidá d’Uviéu solicitó un informe a la Secretaría Xeneral de la Universidá pa conocer si como l’asturianu nun ye una llingua oficial se podía permitir el so usu nes tesis doctorales. La respuesta de la Secretaría universitaria foi negativa y poro Zapico continuó les aiciones llegales afayadices p’algamar el reconocimientu del so derechu.
El ponente de la Sala Tercera del Tribunal Superior de Xusticia d’Asturies Francisco Salto Villén presentó la so inconformidá col votu de la mayoría de los xueces sobre la cuestión planteada por Zapico, ensin que se conoza la orientación d’esa mayoría publicamente. Poro la Sala del TSXA procedió al so cambiu por Jesús Chamorro, una midida d’escepción nel órganu xudicial supremu d’Asturies. Esti cambiu y relevu vendría a amuesar el debate que se ta teniendo ente los diferentes maxistraos asturianos sobre la cuestión llingüística, dao que de la resolución qu’aporten pondríanse en xuegu la validez del artículu cuartu del Estatutu d’Autonomía o la Llei del Asturianu.
La decisión adoptada pol Tribunal Superior de Xusticia en casu de ser positiva a Zapico sentaría un precedente xurídicu qu’abriera les puertes a que los y les doctorandes pudieran presentar les sos Tesis doctorales n’asturianu.