La memoria n’imaxes. El tiempu y l’alcordanza nel cine y más allá ye’l segundu títulu editáu pola Fundación Municipal de Cultura d’Uviéu, presidida por José Luis Costillas, al traviés de la Selmana del Audiovisual Contemporanea d’Uviéu, cola que se da un pasu más na xera d’apurrir materiales que se sumen al discursu añal ellaboráu dende SACU.
Editáu por Trea na so colección Artes, el volume ta coordináu pol profesor y críticu Carlos Losilla, y consta de dolce capítulos y un videoensayu que, en palabres del director de SACU, Pablo de María, afita “el nuesu compromisu como impulsores de nueves iniciatives que fomenten l’alderique y la reflexón”. Losilla va tar n’Uviéu para presentar La memoria n’imaxes na Biblioteca Lorenzo Rodríguez Castellanu (La Granxa). La cita va ser el 31 de mayu a les 19:00 hores con toles garantíes de seguridá ya hixene fites poles autoridaes sanitaries.
Catorce ensayistes y críticos cinematográficos participen en La memoria n’imaxes, autores bien conocíos de la prensa especializada como Charlotte Garson, Toni Junyent, y Sergi Sánchez. El mesmu Losilla robla la introducción d’un llibru que, indica, “da vueltes en redol a lo que toa imaxe tien de buelga del tiempu”, amás de “poner por escritu lo que remembra”.
Va siete años que la Fundación Municipal de Cultura d’Uviéu apostó por xenerar una programación audiovisual calidable. Tres estos años, ésta yá ye una actividá estable que desenvuelve distintes programaciones: la Selmana del Audiovisual Contemporaneu, Radar y el Cine a la lluz de la lluna. Con esti segundu volume, SACU escuerre espublizar les diverses formes cinematográfiques atendiendo por igual a los llinguaxes más clásicos como a les vanguardies.