Un asturianu que tuvo n’Escocia los díes del referéndum va cuntar la so esperiencia nuna xornada entamada por La Llegra. El pasáu 19 de septiembre Escocia decidió democráticamente Sí o Non a la so independencia. Más allá del resultáu, los díes previos y posteriores fueron un fervideru nos principales puntos del país. El periodista xixonés Xicu Ariza viaxó hasta Escocia pa conocer el procesu de cerca y esti vienres 3 d’ochobre va cuntar la so esperiencia nel Centru Social La Llume de Xixón.
A partir de les 19.30 van proyectase semeyes y videos, van esponese materiales de les distintes campañes del referéndum y va dase testimoniu d’esta xornada histórica nun ambiente informal. A la charra-alderique va sigui-y una pequeña folixa a les 21.00 amenizada por música folk, rock-folk y punk-folk. Amás podrá esfrutase de sidra LAllume, Cerveza Caleya y güisqui escocés a precios populares.
L’actividá ta entamada por La Llegra, espaciu uvieín de la esquierda soberanista asturiana, en collaboración col Centru Social La Llume. Una xornada cola que tamién se busca estrechar la collaboración ente estos dos espacios sociales.