La Escuela Oficial d’Idiomes d’Avilés empecipió la selmana pasada, de manera oficial, el nuevu cursu escolar, apostando por abrise a toles modalidaes d’estudios ya implementando l’aprendizaxe d’inglés a distancia, al incorporar el nivel avanzáu a los otros dos disponibles, que tomaben a los alumnos de nivel básicu y entemediu.
Nel actu de presentación del cursu, que se celebró con una xunta ente la dirección del centru avilesín y el restu de coordinadores de les escueles d’idiomes d’Asturies col conseyeru d’Educación, Genaro Alonso, ufiertáronse tamién los datos de matricula y la repartida d’esta dependiendo del idioma pol que se decantaren los alumnos. La Escuela Oficial d’Idiomes d’Avilés cunta con 1.321 estudiantes matriculaos anque entá nun ta cerrada la inscripción pal actual cursu. Toos ellos pártense ente los cuatro idiomes disponibles nel centru, inglés, francés, alemán y chinu.
En total 846 alumnos van ameyorar les sos conocencies n’inglés na see amiesta al IES Nº 5 y van facelo en cuatro grupos (básicu, entemediu, avanzáu y C1), y otros 77 estudiantes decantáronse por aprender inglés al traviés ‘That’s English!’, qu’anguaño incorpora, como novedá, el nivel avanzáu. Esti proyectu dexa a los estudiantes ameyorar les sos conocencies dependiendo de la so disponibilidad horaria, al poder faelo dende un ordenador o bien dende tablets o móviles. Amás, dexa escoyer cuántos módulos van llevar a cabu. Namá tienen de triar la Escuela d’Idiomes un día a la selmana p’ameyorar la área de comunicación oral.
Al pie de ellos alleguen a clases docentes de distintos centros educativos dispuestos a ameyorar la so conocencia del idioma, yá que d’ellos dependen los programes billingües de les sos escueles o institutos. Asina, n’Avilés suman 18 profesores matriculaos anguaño.
Estos programes viéranse ameyoraos a nivel rexonal. Asturies cunta con ocho escueles d’idiomes, qu’anguaño recibieron más de 8.600 matrícules, una cifra similar a la d’años anteriores. El Principáu implementó tamién nos centros d’Uviéu y Xixón el nivel d’inglés avanzáu a distancia. A esto súmase’l nivel cuatro de iniciación de Chinu, nel que pueden matriculase los estudiantes d’Uviéu y Xixón dende anguaño.
Pa esti curso Educación preve 6.000 alumnos d’inglés en tolos centros, a los que se suman otros 1.300 de francés, más d’un millar d’Alemán, unos 180 d’italianu y, a lo último, 150 inscritos p’aprender chinu. Anguaño, l’alumnáu qu’acredite una discapacidá igual o superior al 33% nun va tener que pagar el preciu públicu establecíu pa los distintos cursos ufiertaos nes escueles oficiales.