La Conseyería de Cultura convoca les sovenciones pa la normalización del asturianu

Nel BOPA de 4 d’abril de 2008 convóquense les sovenciones pa la promoción del llibru n’asturianu o gallego-asturianu, unes ayudes que van dase a empreses editoriales privaes pa la edición de llibros orixinales o traducíos al asturianu que se faigan a lo llargo del añu 2008. Sicasí, estes nun son les úniques sovenciones convocaes, a finales de la selmana pasada convocáronse tamién les ayudes a medios de comunicación, escritores en llingua asturiana y a la promoción de la música n’asturianu.

Les ayudes a medios de comunicación incluyen a empreses periodístiques, radiofóniques, televisives o d’internet polos gastos remanecíos de la producción d’espacios onde s’emplegue la llingua asturiana, o’l gallego-asturianu nel so ámbitu, a lo llargo del añu 2008, bien davezu n’informaciones xenerales, bien n’espacios periódicos y fixos, bien en programes estraordinarios d’interés especial, pero siempre qu’esi usu “contribuya a la normalización y dignificación del usu social de la llingua y sean espacios configuraos como propios del mediu de comunicación y asumíos por él”.

Les ayudes pa la promoción de la música n’asturianu van dase a empreses privaes pa la promoción de la música en llingua asturiana y, nel so ámbitu, en gallego-asturianu, que se faiga n’estremaos soportes (discos, cintes, CD, etc.) nel añu 2008. A los fines de la normalización sociollingüística, l’asturianu, o nel so casu’l gallego-asturianu, habrá ser la llingua normal y vehícular en qu’apaezan les lletres de los cantares y tol material impreso qu’acompañe la obra musical.

Amás, y como ye vezu dende va dellos años, tán convocaes sovenciones pal fomentu de la creación lliteraria n’asturianu o gallego-asturianu. L’oxetu de la presente convocatoria, según apaez nel BOPA, “ye la concesión d’ayudes económiques en réxime de concurrencia competitiva a los/les escritores al envís d’incentivar el so esfuerciu personal, d’ameyorar les sos posibilidaes práctiques de dedicación a l’actividá creativa y de fomentar, en definitiva, la creación lliteraria n’asturianu o gallego-asturianu nes modalidaes de poesía, narrativa, teatru y ensayu”.

Bases completes de les sovenciones