La Conseyería de Cultura convoca cinco llinies de sovención pal fomentu de la creación artística y teatral

La Conseyería de Cultura y Turismu del Principáu d’Asturies acaba de convocar cinco llinies de subvención, por un importe global de 322.250 euros, pa fomentar la creación artística y teatral n’Asturies. El plazu de presentación de les solicitúes fina’l próximu 15 de marzu. Les llinies de subvención son les siguientes:

Formación y promoción artística (26.250 euros). Son ayudes económiques en réxime de concurrencia competitiva pa la formación artística en materia d’artes escéniques, música, danza, cine y artes plástiques, entendiendo por formación tanto l’asistencia a seminarios, alcuentros o cursos de corta duración como la realización de másters o posgraos. Tamién van ser oxetu d’estes ayudes les muestres d’obres d’artistes nacíos o residentes n’Asturies que se celebren en llugares con suficiente prestixu fuera del territoriu d’esta comunidá autónoma y con una actividá creativa avalada por un contrastáu currículum y con sofitos institucionales y/o particulares cualificaos.
Subvenciones a empreses pa la realización d’actividaes culturales d’interés rexonal (40.000 euros). Trátase d’ayudes económiques en réxime de concurrencia competitiva a empreses que tengan el so domiciliu social n’Asturies para la realización d’actividaes culturales concretes d’interés rexonal (actividaes discográfiques, editoriales, cinematográfiques y de videu…) en 2010.
Subvenciones pa programes d’actividaes culturales d’asociaciones, fundaciones culturales privaes y actividaes culturales d’interés rexonal promovíes por particulares, fundaciones y asociaciones (178.500 euros). Son ayudes económiques en materia de concurrencia competitiva pa programaciones d’actividaes culturales feches por asociaciones y fundaciones culturales privaes y actividaes culturales d’interés rexonal promovíes por particulares, fundaciones y asociaciones. Puen solicitales cualesquier asturianu o quien viva nel Principáu d’Asturies, asociación cultural o fundación cultural privada, que tenga’l so domiciliu social nel Principáu y que desendolque principalmente la so actividá nesta Comunidá Autónoma.
Actividaes escéniques por persones o grupos non profesionales (10.000 euros). L’oxetivu d’esta convocatoria ye la concesión d’ayudes económiques en réxime de concurrencia competitiva pa la realización d’actividaes escéniques pa la producción o adecuación de montaxes en 2010.
Actividaes escéniques por empreses privaes y grupos de teatru profesional (67.500 euros). Son ayudes económiques a empreses en réxime de concurrencia competitiva pa la realización d’actividaes escéniques y la producción o adecuación de montaxes. Tamién van poder ser oxetu d’ayuda los proyeutos de distribución entendiendo por tales la presencia en muestres, festivales o feries de teatru nacionales ya internacionales, asina como la celebración de xires fuera del Principáu d’Asturies.