La comunidá africana residente n’Asturies organiza el prósimu sábadu 4 n’Uviéu una folixa solidaria y de presentación de l’asociación na que se xunta esti colectivu. Los grupos Dixebra y Skama la Rede van ser los encargaos de poner música a esti alcuentru de los emigrantes africanos abiertu a tola xente que quiera sumase a él.
La cita ye a les 22.00 hores nel Polideportivu Fozaneldi (C/El Mayorazu, e/n)de la ciudá carbayona y les entraes tan puestes a la vienda a un preciu de seis euros empobinaos a sofitar les actividaes de la nueva asociación. El nome del colectivu que se presenta el sábadu ye Comunidá d’Africanos Residentes n’Asturies.