El cine contemporaneu vuelve rodar polos conceyos asturianos de la mano de La Cinemateca Ambulante que programa para esti trimestre un total de 103 proyecciones que van tener llugar nos 22 conceyos collaboradores d’esta edición.
La Cinemateca Ambulante ye’l ciclu de cine itinerante de Llaboral Cinemateca, l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura. La programación cinematográfica ufiertada por La Cinemateca Ambulante ta coordinada pol Festival Internacional de Cine de Xixón.
El Conceyu de Sotu’l Barcu súmase esti trimestre al programa cinematográficu qu’ufierta, dende’l miércoles 26 de xineru, cuatro títulos en versión orixinal subtitulada n’español y con entrada gratuita. Collaboren tamién nesta ocasión los conceyos d’A Veiga, Cabrales, Cangas, Cangues d’Onís, Castrillón, Colunga, Gozón, L.lena, Llanera, Llanes, Llangréu, Nava, Navia, Noreña, Piloña, Ribedeva, Ribesella, Siero, Tinéu, Valdés y Villaviciosa.
Tres el so estrenu na sección Esbilla del Festival Internacional de Cine de Xixón, llegaba a La Cinemateca Ambulante la película Mines de Figareo. Memoria d´una llucha (1978-1980) del cineasta mierense Alberto Vázquez, un documental sobro unu de los conflictos más importantes na minería asturiana nos años de la transición española. Primeros meses de 1978. Mines de Figareo fuera xuna de les empreses carboníferes más rentables. La familia dueña de la mina lleva años esplotando les sos capes de forma irracional y, irremediablemente, llega l’avisu de zarru. Empiecen entós dos años de llucha que van rematar en 1980 cola nacionalización de la esplotación. Dos años de guerrilla urbana en defensa de los puestos de trabayu que rematen col sonáu episodiu en que cuatro miembros de les Comisiones Obreres retuvieron al patrón a lo cimero del castillete mientres 10 hores.
Un gran Mads Mikkelsen (Hannibal, Otra ronda, Casino Royale) protagoniza Caballeros de la xusticia de Anders Thomas Jensen, un thriller nórdicu cargáu d’humor negro, tresgresor y políticamente incorrectu qu’españó les taquilles del so país d’orixe y se hai llevada nada menos que cuatro galardones nos Danish Filme Awards, incluyendo’l de meyor actor. El militar Markus tien de tornar a casa cola so fía adolescente, Mathilde, cuando la so esposa muerre nun tráxicu accidente de tren. Tou paez ser por causa de la mala suerte pero Otto, espertu en matemátiques y tamién pasaxeru de tren siniestrado, ta convencíu de que daquién ta detrás de too esto.
Otru númberu unu na taquilla, nesti casu en Francia, y qu’afaró nos Premios César alzándose con siete galardones (incluyendo a meyor película y meyor dirección) ye Adiós, fatos, xuna traxicomedia tienra y absurda empobinada, y protagonizada, por Albert Dupontel que cunta la hestoria d’una muyer gravemente enferma (Virginie Efira) en busca del so fíu, a quien se vio obligada a abandonar cuando tenía quince años. Pel camín va atopar con un home depresivu y un ciegu que lu acompañarán na so odisea.
Completa’l programa d’esti trimestre’l debú nel llargumetraxe del realizador David Martín de los Santos que, con La vida yera eso, opta a dos Premios Goya (a meyor director novel y meyor actriz pa Petra Martínez). María (Petra Martínez) y Verónica (Anna Castillo) son dos inmigrantes españoles de distintes xeneraciones que s’atopen nun hospital en Bélxica. Ellí empiecen a forxar una relación d’amistá hasta qu’un inesperáu acontecimientu va llevar a María a entamar un viaxe al sur d’España en busca de la familia de Verónica.
Información completa de les proyecciones, feches y horarios na web www.laboralcinemateca.es