La segunda caravana de coches pola oficialidá desenvolviose esti sábadu día 10 per Peñes nuna nueva programación d’iniciatives ciudadanes de la Xunta pola Defensa de la Llingua Asturiana en cuenta de los ataques que se tán viviendo na normalización social del asturianu.
La Xunta pola Defensa de la Llingua Asturiana vieno preparando una serie d’iniciatives ente los ataques que se tán viviendo hacia los pocos avances que se dan na normalización social del asturianu (recursos de Delegación del Gobiernu a ordenances y reglamentos, campañes mediátiques contra la recuperación de la toponimia, parálisis na presencia de la nuestra llingua na radiotelevisión pública, etc.) y la caravana pola oficialidá que ya se desenvolviere pol conceyu Bimenes na so primer edición ye una d’elles.
L’Asociación viera la necesidá de responder con actividaes movilizadores pa que la demanda de la oficialidá siga tando presente tol añu, más allá de les feches reivindicatives de siempre. Tamién se busca aprovechar y afitar los llazos de collaboración abiertos colos alcaldes y conceyales que participaron na iniciativa de Conceyos pola Oficialidá.
La segunda caravana de coches pola oficialidá salió pela mañana, a les 11:30h. del Faru Peñes y percorrió los conceyos de Gozón y Carreño.