L.lena presenta’l discu “Música Tradicional en Conciyu L.lena 2”

El Serviciu de Normalización Llingüística del Conceyu de L.lena va presentar esti vienres día 11 de xunu a les 19h nel Teatru Vital Aza, el discu “Música Tradicional en conciyu L.lena2”. Esta grabación ye’l segundu trabayu de recoyida de tradición oral que se fai nel conceyu. L’anterior trabayu editóse nel 2008.

L’archivu, cedíu por Xosé Antón Fernández “Ambás”, percuerre la xeografía del conceyu recoyendo los cantares tradicionales de la zona. Podemos alcontrar, villancicos, gaita y tambor, toná, dances, etc interpretaos por vecines y vecinos de l.lugares como Carabanzo, Piñera, Congostinas, Casorvía, Muñón Fondiru, Payares, La Romía, Güel.les, Piedracea, Samiguel del Río, ente otros.

La presentación del discu, pretende ser un homenaxe a toles persones que participaron nel mesmu y munches d’elles van interpretar nel Teatru Vital Aza dellos cantares qu’apaecen nel trabayu.

L’actu va grabase pal programa de la RTPA “Sones”.

Dende’l Conceyu L.lena, afirmen “apúestase pola recuperación de la cultura tradicional de L.lena” y esti segundu trabayu “ye prueba d’ello”. Pa los responsables de la estaya responsable “La importancia de dar a conocer lo tradición oral de L.lena, nun solo a les vecines y vecinos del conceyu sinón a tola sociedá interesada ye ún de los oxetivos del Serviciu de Normalización Llingüística , por ello va regalase un cd a toles persones qu’asistan a la presentación, amás de facer repartu pelos centros educativos, y biblioteques del Conceyu”.