L’asturianu resonó na Universidá d’Oxford na voz de Xosé Lluis García Arias

Xosé Lluis García Arias, profesor titular de Filoloxía de la Universidá d’Uviéu, dio n’asturianu la conferencia “El Diccionariu Etimolóxicu de la Llingua Asturiana y el so interés hispánicu” nel Linacre College de la Universidá d’Oxford (Reinu Xuníu). La conferencia celebróse nel marcu d’un programa dedicáu les llingües romance de la Península Ibérica.

Nel trescursu de la conferencia, l’ex presidente de l’Academia de la Llingua Asturiana solliñó que los datos recoyíos de la tradición oral puen proporcionar referencies “que permitan afondar na investigación d’aspeutos tovía mal conocíos de los nuesos romances”.