L’asociación lleonesa “La Caleya” entrega esti sábadu los sos premios de rellatu curtiu nel Conservatoriu d’Astorga

L’Asociación “La Caleya” convocaba esti añu per primer vegada un premiu de rellatos curtios embaxo’l mesmu nome y abiertu a la participación d’escritores de tol dominiu llingüísticu ástur. El fallu del xuráu va facese públicu esti sábadu a les ocho la tarde nuna ceremonia que va celebrase nel auditoriu del Conservatoriu “Ángel Barja”, asitiáu na llocalidá lleonesa d’Astorga. Nel actu van tar presentes Enrique Soto de Soto, teniente alcade d’Astorga y Conceyal de Cultura Tradicional y Valores Autóctonos, y Mónica Pérez García, presidenta de l’Asociación qu’otorga’l galardón.

El xuráu d’esta primer edición del premiu tuvo formáu por Héctor García Xil, Roberto González-Quevedo y Fernando Álvarez-Balbuena faciendo de secretariu Mariano García Quintas.

Depués de la entrega, Elena Monedero y Sara Fernández, alumnes del Conservatoriu van interpretar dellos temes a al guitarra, pa finar cola llectura de fragmentos de los cuentos ganadores per parte de los autores premiaos, que’l Conceyu d’Astorga y l’Asociación “La Caleya” guarden con gran secretu hasta’l sábadu.