Redacción.
L’ALLA rescata composiciones n’asturianu de principios del sieglu XX col títulu ‘Versos y proses de 1906 a 1907’, el volume númberu 93 de la so colección Cartafueyos de Lliteratura Escaecida, la edición ta fecha por Rafael Rodríguez Valdes, hestoriador que yá espublizare otres ediciones recuperando testos, como los documentos de Conceyu Bable.
Nesti cartafueyu recueyense composiciones en versu de Xeromo de Requexo, Pachín de Melás, María Balbín, Perfecto Fernández Usatorre, Marcos del Torniello y Pepín Quevedo, amás de dos testos en prosa, ún escritu por Lázaro Jose García Lueso y otru por un desconocíu ‘X.’.
En pallabres del autor de la edición, Rodríguez Valdes, “ye imprescindible recoyer toles manifestaciones documentales producíes n’asturianu, llámense o non lliteraries, p’analizar y interpretar la lliteratura asturiana dientro del so marcu históricu ya ideolóxicu”.