L’Academia de la Llingua Asturiana denuncia la propuesta de Curriculum d’Educación Infantil

L’Academia de la Llingua Asturiana emitió ayeri un comunicáu nel que declaraba que “llueu de revisar col máximu procuru’l conteníu y plantegamientos de la propuesta de Currículu d’Educación Infantil, quier treslladar a la sociedá asturiana y, de mou especial, a les estayes rellacionaes col ámbitu educativu que’l documentu curricular incumple dafechu l’espíritu y la lletra de la Llei d’Usu del Asturianu, darréu que l’artículu 10.1 de la mesma garantiza la enseñanza de la llingua asturiana en tolos niveles y graos educativos.”

De la mesma forma, l’ALLA denuncia que “Les referencies, escases y descontestualizaes, que’l testu curricular fai del asturianu constitúin un recursu de maquillax qu’en nengún casu dexa la posibilidá d’enseñar y dignificar la nuesa llingua nesta estaya educativa.”

Diz amás l’Academia, qu’“El currículu, arriendes d’ello, amuesa una gran debilidá didáutico-pedagóxica al nun tener en cuenta que l’asturianu ye la llingua familiar de munchos escolinos d’Asturies colo qu’ello implica de desventaya pal deprendizax de la llingua castellana y/o estranxera.”

Asinamesmo, l’Academia de la Llingua Asturiana anuncio qu’en contautos calteníos col Conseyeru d’Educación, “féxo-y ver estes circunstancies asina como la grave responsabilidá de la Conseyería nel casu de caltenese l’actual estáu de redaición del documentu curricular.”

“La institución -sigue’l comunicáu- en tou casu, fairá llegar a los responsables educativos del Principáu les enmiendes afayadices pa que la presencia de la Llingua Asturiana s’axuste a les llendes xurídiques calteníes na Llei d’Usu del Asturianu y anima a la comunidá educativa asturiana (padres y madres d’escolinos, sindicatos d’enseñanza, profesoráu, etc.) a facer lo propio”.