L’Iberoamericanu celebra les terceres Xornaes Edita Asturies

El Gremiu d’Editores d’Asturies y el Salón del Llibru Iberoamericanu de Xixón entama, en collaboración con Cedro, la Cátedra Xovellanos de la Universidá d’Uviéu, la Cámara de Comerciu, el Conceyu de Xixón y el Gobiernu asturianu, les III Xornaes Edita Asturies. La edición d’esti añu lleva por títulu “El sector editorial énte la crisis económica y el retu dixital” y va cuntar con trés meses redondes, onde van participar profesionales del sector.

La primer mesa redonda va entamar güei xueves a les 12:30 hores y va tratar de Les feries del llibru. Renovase o morrer, participando Diego Valverde, director de la Feria del Llibru de Valladolid; José Luis Acín Fanlo, director del Centru del Llibru d’Aragón; Manuela Ribeiro, directora del festival portugués Correntes d’Escritas, y Héctor Escobar, director de la Feria del Llibru de Lleón.

Güei mesmu, a les cinco la tarde, “Los llibros resisten la crisis” va celebrase cola participación de M.ª Luisa Amores, presidenta del Gremiu d’Editores d’Andalucía; Marta Magadán, presidenta del Gremiu d’Editores d’Asturies; César Sanz, directivu del Gremiu d’Editores de Castiella-Llión, y Cristian Velasco, d’Ediciones Madú.

Mañana vienres, a les 11:30 hores, va celebrase la última de les meses, col tema “Dixitalización de llibros y propiedá intelectual”. Nella van tar presentes Magdalena Vinet, de Cedro; Antonio María Ávila, de la Federación del Gremiu d’Editores d’España, y Raúl Figueiroa Sartí, de F&G Editores.