L’Atenéu n’Alfoz desixe respetu pola cultura asturiana a los responsables del Niemeyer

Énte lo que califiquen como “increíble vetu” a la realización del Conciertu pola Oficialidá nel Centru Niemeyer, l’Atenéu n’Alfoz, d’Avilés manifestó’l so fondu esmolecimientu y la so solidaridá cola Xunta pola Defensa de la Llingua Asturiana na so denuncia pública “d’esti atentáu escontra la cultura asturiana”.

L’Atenéu N’Alfoz atopa nesta decisión “una amuesa más de la actitú d’auto-odiu promovida polos socesivos gobiernos d’Asturies, col oxetivu de dexar la nuesa llingua y cultura morrer nel escaezu”. Amás, pa l’Atenéu “dexa bien a les clares lo qu’entienden por respetu a la espresión popular”. Poro, esti coleutivu desixó “respetu pola cultura asturiana a los responsables del Centru Niemeyer y reafita’l so compromisu diariu cola oficialidá del asturianu”.