L’asociación Esbardu soluciona los sos problemes cola SGAE y podría volver a organizar el Festival Intercélticu d’Avilés

L’asociación avilesina Esbardu regularizó la so situación cola SGAE, ingresando los atrasos por drechos d’autor de 1998 a 2004. Una situación que-y permitiría volver a acceder a ayudes públiques y polo tanto, a organizar el Festival Intercélticu d’Avilés, que l’Ayuntamientu siguió celebrando embaxo’l nome de Beltaine, énte la imposibilidá de siguir apoyando al Festival, que llegó a tener embargada pola SGAE, la marca del eventu, que ta declarada Fiesta d’Interés Turísticu Rexonal.

El director de la SGAE nel Noroeste, Javier Vidal, mostróse satisfechu por esta regulación de los atrasos referentes al Intercélticu d’Avilés. Según informó la Sociedá Xeneral d’Autores y Editories, Vidal dixo que “la música de raíz necesita del nuesu respetu y cariñu”. “Ye fundamental reconocer, primero, el trabayu del autor o del arreglista, figura imprescindible y valiosa nesti ámbitu, y dempués da-y el so xustu salariu pa garantizar la continuidá de la nuesa herencia cultural”, esplicó.