L’Asociación de Trabayadores de la Normalización Llingüística denuncia “la hipocresía del Conseyeru Riopedre”

L’Asociación de Trabayadores de la Normalización Llingüística emitió un comunicáu nel que denuncia les declaraciones feches pol Conseyeru d’Educación sobre’l billingüismu. Nes declaraciones feches por Riopedre en Xixón, ésti dixo “que l’alumnáu matriculao en clases billingües saca meyores notes”. Lo que pa l’ATDNL ye “una cosa que yá se sabía dende va tiempu” y polo tanto “un insultu”.

Pa los miembros d’esti coleutivu “lo hipócrita ye que s’atreva a dicir eso, un conseyeru que nun acaba de solucionar los problemes de la escolarización n’asturianu, que nun garantiza’l derechu individual de los escolinos y escolines a estudiar asturianu, siempre dependiendo de ratios y de la voluntá de dalgunos profesores, que tien a la llingua asturiana como optativa en secundaria vulnerando la voluntariedá de la que fala l’Estatutu d’Autonomía y con la mayoría de les escueles concertaes ensin cumplir la llei, como’l casu de Loyola n’Uviéu que yá denunciemos va unos meses”.

“Con estos antecedentes de marxinación al asturianu”, dicen nel comunicáu, “na enseñanza resulten insultantes les últimes declaraciones del conseyeru d’educación, al nun ser que nun considere al asturianu como una llingua, que tal paez viendo como actúa”.

Por too esto los miembros de l’Asociación piden al señor Riopedre que la so conseyería “cumpla cola llei y cumpla la promesa que ficiera va años publicamente de que l’asturianu diba empezar a ser llingua vehicular na enseñanza p’acabar de verdá cola discriminación llingüística y los escolinos y les escolines que voluntariamente quieran, puedan tener una educación de calidá y n’asturianu”.