Política LAlla refuga dafechu la propuesta del conteníu del artículu 4u del Estatutu dAutonomía by asturnet 11 de xunetu, 2008 written by asturnet 11 de xunetu, 2008 Llueu de conocer la propuesta de redaición del Artículu 4u del Estatutu d’Autonomía p’Asturies, pautada polos partíos mayoritarios (PSOE y PP) y asoleyada na prensa asturiana del vienres 11 de xunetu de 2008, l’Academia de la Llingua Asturiana quier dexar afitao y dar anuncia pública de lo que vien darreu: 1) La redaición propuesta ye un intentu consciente, plantegáu arremente, d’acabar dende’l puntu de vista llegal col patrimoniu inmaterial más importante d’Asturies: la so llingua y cultura. 2) L’Academia refuga dafechu la redaición y conteníu del artículu 4u porque supón nidiamente un atentáu contra la llingua y contra la dignidá del pueblu asturianu. Non solo nun hai nengún avance, sinón que ye un retrocesu bultable en rellación colos llogros d’estos años. 3) De nenguna de les maneres l’Academia de la Llingua Asturiana sedrá cómpliz d’un desafueru como’l que supón la redaición que se nos ufierta na actual reforma del Estatutu d’Autonomía. 4) Los representantes políticos que roblen el pautu tienen que tener clara la so responsabilidá histórica nel procesu de desaniciamientu de la llingua asturiana que se ta produciendo. 5) L’Estatutu con esta redaición dexa fuera a una parte importante de los asturianos. Darreu d’ello ye, dende la so nacencia, un estatutu provisional que fairá falta volver a iguar bien llueu. Y ello nun ye bono nin pa la llingua, nin p’Asturies, nin pa la so xente. 6) Los asturianos han saber que si nun problema de fácil arreglu lo que s’intenta ye buscar les víes más dañibles, ello lleva apareyao que la llingua seya elementu permanente de discrepancia y confrontación ente los asturianos. Los firmantes d’esa redaición son los únicos que tán xenerando na sociedá una tensión innecesaria. 7) Nun se pue almitir como xida pa esti tratamientu llamentable la invocación a los problemes llingüísticos d’otres comunidades. Nes comunidaes con problemes como los que s’anuncien foron, nunos casos, la inhibición d’esos partíos políticos y, n’otros, una trayeutoria indefendible los que xeneraron problemes qu’en nada s’asemeyen al casu asturianu. Ente nós podíen iguase mui bien les coses, pero la vía qu’escueyen les fuercies polítiques mayoritaries ye, llastimosamente, un brinde a semar el desánimu y la protesta social desque nun dexen ninguna vía alternativa razonable. 8) L’Academia fai un llamamientu a los militantes del PSOE y del PP pa que faigan entrar en razón a unes executives qu’amuesen de contino’l más xabaz complexu antiasturianu. Nun se pue pensar que dientro d’estos partíos seyan mayoritaries les posiciones viscerales a la escontra de la llingua d’Asturies y de les sos posibilidaes de futuru. Encamentamos, entós, a esa militancia y a tola sociedá asturiana que faigan tolo posible pa que nestos momentos inciertos pa la llingua asturiana se pueda reconducir una situación que va oxetivamente a la escontra de la unidá, harmonía y futuru del pueblu asturianu. 0 FacebookTwitterPinterestEmail Anterior Cangas acueye la presentación de “Primos Hermanos” de Rafa Lorenzo siguiente Xosé Lluís Campal va lleer poemes nasturianu nun recital que va celebrase’l 23 de xunetu en Lisboa Tamién te podria gustar Marta Mori renuncia a la vicepresidencia de l’Academia... Lluz verde a la convocatoria de subvenciones pa... Xixón homenaxeó a Jean-Pierre Darmendrail pola so contribución... El Principáu impulsa’l Festival Inclusivu por la Diversidá... Xixón lidera’l ranking asturianu del Observatoriu de la... L’ALLA denuncia la inseguranza xurídica nel exerciciu de... La XDLA reclama que les rutes dixitales de... IX pide instrucciones clares na implementación de la... Aconceyamientu ente l’Academia y Podemos pol presupuestu del... Grupos de participación intantil y adolescente aconceyen los...