L’ALLA albidra que la sentencia del Contencioso-Alministrativu fraya los principios llegales de la Llei d’Usu

L’Academia de la Llingua Asturiana comentó güei la Sentencia del Xulgáu de lo Contencioso-Alministrativu númberu 3 sobro la negativa del derechu al usu del asturianu per parte de los funcionarios del Principáu. L’ALLA que la mentada sentencia, de fecha 22 de marzu, “va dafechamente a la escontra del espíritu y la lletra del Autu del Tribunal Constitucional (TC), de fecha 25 de febreru del 2010, qu’afitaba, xustamente, el que tolos ciudadanos, al marxe del so llabor profesional, se pudieren empobinar nesta llingua a los muérganos dependientes del Principáu d’Asturies”.

La institución calificó la decisión de “sorprendente” y alvirtió “fraya los principios llegales calteníos na Llei d’Usu del Asturianu de 1998 y, de mou concretu, l’Artículu 4.2 onde se conseña la validez del emplegu d’esta llingua nes comunicaciones orales o escrites de los ciudadanos col Principáu d’Asturies”.

L’ALLA recuerda que yá la Llei d’Usu ye percurtia “no que cinca al exerciciu de los derechos llingüísticos y, dende llueu, non homologable al del restu de comunidaes del Estáu con llingua propia”, entá lo ye más “na so puesta en práutica”. Yá, que según comenten dende l’ALLA “les instituciones de gobiernu y los muérganos xurisdiccionales actúen mesmamente a la escontra de lo afitao na mentada Llei”.

L’ALLA ve en “casos tan llamentables como’l qu’agora comentamos amuesen, una y otra vuelta y de mou inequívocu, que l’argumentación, que dacuando remanen dalgunos dirixentes políticos asturianos nel sen de sopelexar que n’Asturies nun fai falta la oficialidá de la llingua porque la llibertá al usu llingüísticu yá ta reconocida llegalmente, nun tien xacíu dalu”.

Afítase l’Academia na solución “del estatus d’oficialidá pa la llingua histórica d’Asturies” como “ única garantía de que los nuesos derechos llingüísticos se puean exercer con llibertá y ensin imposiciones” y camienta que “nesti momentu del procesu de recuperación llingüística la sociedá asturiana ta dafechu madura p’acoyer una oficialidá consensuada, non traumática y afayada a la propia situación sociollingüística de la comunidá”.

Por ello, l’Academia encamenta a la Xunta Xeneral del Principáu y al Parllamentu Español, “la solución xurídica d’oficialidá pa iguar la situación llingüística n’Asturies. Ello ye una cuestión urxente y de llexítima xusticia”.