L’Academia presenta Lletres Asturianes 107 y Ciencies 2 nes XXXI Xornaes Internacionales d’Estudiu

Esta tarde inauguraráse’l congreu añal de l’Academia de la Llingua Asturiana, les XXXI Xornaes Internacionales d’Estudiu. Como cada añu, na Facultá de Filosofía y Lletres d’Uviéu. Los actos van entamar a les cuatro la tarde cola presencia del Rector de la Universidá d’Uviéu Vicente Gotor, la Decana de la Facultá de Filosofía y Lletres, Cristina Valdés Rodríguez, y de la Presidenta de l’Academia de la Llingua Asturiana, Ana María Cano González. Darréu os actos van entamar con una ponencia de Xosé Lluis García Arias sobre la “Conciencia llingüística y testos medievales nel Dominiu Ástur”. Amás, güei, van presentase la edición dixital del boletín de la institución, “Lletres Asturianes 107” y el segundu númberu de la revista dixital “Ciencies. Cartafueyos de Ciencia y Teunoloxía 2”, dixirida por Carlos Lastra.

Darréu, a les 17.15 hores, vendrán les comunicaciones “El léxicu mineru. Dalgunes cuestiones etimolóxiques”, de Lucía Cortina; “La estensión de los plurales -es, -en en Sanabria”, de Xuan Xosé Lajo; y “Venceyamientu de les variantes de la llingua y otres llingües: análisis multivariante pente medies d’algoritmos xerárquicos”, de Rubén Fernández Martínez, pesllando la metá de la tarde con un alderique y posa.

La segunda parte de la tarde, de magar les 18:30 hores, va tener espaciu pa la ponencia “La entonación asturiana nel marcu de les llingües romániques” de Carmen Muñiz Cachón, de la Universidá d’Uviéu. Dempués, Xosé Afonso Álvarez Pérez, de la Universidá de Lisboa siguirá con “Abril buenu era si el gallegu non viniera”. Distribución geoparemiológica de refrenes meteorológicos’, zarrando la xornada la presentación de dos espublizaciones de l’Academia de la Llingua Asturiana, la edición dixital del “Lletres Asturianes 107” y el segundu númberu de la revista dixital “Ciencies. Cartafueyos de Ciencia y Teunoloxía 2”, dixirida por Carlos Lastra.

Na segunda xornada, la del miércoles 7, que va entamar a les cuatro la tarde, podrá sentise la ponencia “Travesíes de la poesía asturiana” de Leopolodo Sánchez Torre, de la Universidá d’Uviéu, y trés comunicaciones a partir de les cinco la tarde: “Poesía n’asturianu de Félix Aramburu”, de Xosé Ramón Iglesias Cueva; “Delles constantes temátiques na poesía del Surdimientu. Una güeyada a l’antoloxía Palabres”, de Cristina García; y “Delles aportaciones pa una historia de la publicidá n’asturianu”, d’Inaciu Galán. Como dempués de cada bloque de ponencies, un alderique y posa.

A les 18:15 vuelven les ponencies con “Aspeutos de les rellaciones ente tradición y creación lliteraria”, de Roberto González-Quevedo; “Brotos cativos: una mirada circunstancial sobre dellos poetes últimos”, de Xosé Bolado; y “La (des)protección de la llingua en Lleón y Zamora”, de Nicolás Bartolomé Pérez. A les siete y cuartu, Emilio Frechilla, de la Universidá d’Uviéu, va dar llectura a la ponencia “Una güeyada a la novela negra asturiana de güei” y darréu la presentación de “Tirán el Blancu”, obra traducida al asturianu del catalán por Pablo Suárez García y qu’asoleyen a comuña ALLA y Acadèmia Valenciana de la Llengua, cuntando cola presencia de los presidentes de dambes instituciones, Ana María Cano y Ramon Ferrer.

La encargada d’abrir la tercer y cabera xornada, a partir de les cuatro la tarde, sedrá Ana Cano, presidenta de l’ALLA, con una ponencia conxunta titulada “Etimoloxía asturiana ya etimoloxía romance: aportaciones mutues nun contestu de camudamientu metodolóxicu pendiente”, con Éva Buchi, d’ATILF/CNRS y la Universidá de Lorraine, y María Reina Bastardas, de la Universidá de Barcelona.

Alredor de les cinco la tarde marta Mori d’Arriba dará llectura a “La traducción nel sistema lliterariu asturianu (II). La poesía del sieglu XVIII”. Darréu y cola “Evolución de la parroquia de La Santa Cruz de Xove (Xixón)” aportará Cristina García-Sampedro; pesllando la primer parte de la xornada “L’agua menudo: nomes y variación xeolectal”, d’Héctor García Xil; y “De lo prerromano a lo medieval: la formación del paisax d’Asturies”, de Margarita Fernández Mier.

La tarde va siguir a les 18:30 con dos ponencies del campu de la comunicación, una de Próspero Morán, director d’Asturnews, titulada “Aportaciones del periodismu dixital al desendolcu históricu de la Llingua na Asturies contemporánea”, y otra de Cristobal Ruitiña, embaxo’l nome “Industrializar o perecer. Los medios de comunicación como motores de revitalización cultural”. Martín Sevilla Rodríguez falará de la “Toponimia de monesterios medievales escaecíos”, pesllando les XXXI Xornaes a les 19:30 con Elena E. Rodríguez Díaz, de la Universidá de Huelva, cola so ponencia “Lengua y escritura en el Alto Seya según los documentos de la Edad Media y la Edad Moderna”.

Les Xornaes son de llibre asistencia, pero les persones que quieran matriculase, pa recibir un certificáu acreitativu, pueden facelo nel llar de l’ALLA, na cai L’Águila númberu 10, o nel teléfonu 985 211 837.