Acaba de rematase la segunda fase del XIII Programa dIntercambiu de Llibros de Testu, en Xixón, quentamen l’Asociación Estudiantes Progresistas y la Confederación Asturiana dOrganizaciones de Padres dAlmunos (COAPA) cola collaboración del Conceyu de Xixón, el CMX y el CMPA. El programa busca afalar lusu continuáu de los llibros de testu, y los sos organizadores defenden les ventayes pa la econonomia de les families y lalministración y pal mediu ambiente. Javier Suárez Llana, coordinador del Programa cuéntanos los detalles duna edición que califiquen como ésitu pola medría de participantes.
-Acaben de rematar la trecena edición del Programa con un importante crecimientu del númberu de participantes, ¿ayuda la crisis o ta xenerándose conciencia de la importancia de recuperar los llibros dun añu pa otru?
-Creemos que los dos factores inflúin. Per un llau, mientres los trece años que llevamos faciendo’l Programa repartimos namás llibros, sinón que tamién facemos por concenciar a families y estudiantes sobre la importancia de dotar a los llibros de testu d’un usu que s’enllargue mientres más d’un cursu, non yá por una razón social, económica y educativa (el derechu constitucional a la gratuidá de la Educación), sinón tamién por razones culturales y medioambientales: la reutilización de los recursos y la solidaridá como base pa un desenvolvimientu más caltenible. Y ensin dulda estos mensaxes calaron nos participantes del Programa. Y per otru llau, efectivamente, ta’l contestu económicu: les families cunten con menos recursos, y busquen por tanto métodos alternativos a la tradicional compra de los llibros, y esto notóse d’una manera significativa nos dos ediciones últimes.
-¿Qué ventayes tien reutilizar añu tres añu los llibros de testu?
-Ventayes tien munches. Quiciabes la más evidente seya l’aforru económicu que xenera nes families que participen en programes d’intercambiu como’l nuesu. Pero nun ye la única. Un desenvolvimientu más caltenible cultural y medioambientalmente pasa por amenorgar los residuos, y una manera de consiguilo ye allongar la vida de los recursos, nesti casu de los llibros. Si en cuenta de mientres un añu usamos un llibru demientres cuatro, la xeneración de residuos va amenorgar a la cuarta parte, y tamién la nueva producción; esto ye, va facer falta baltar cuatro vegaees menos árboles que col sistema d’un namás un usu.
-Con toes eses razones al so favor, ¿por qué cree que nun sestablez un programa xeneralizáu dende la Conseyería dEduación?
-Porque hasta agora nun hubo un apueste políticu seriu y claru pola gratuidá de la Educación. Nel añu 2006 anuncióse que se diba a poner en marcha un sistema d’ayudes a la compra de los llibros, y nesi momentu Estudiantes Progresistas y COAPA propunximos a la Conseyería qu’estableciera un sistema de préstamu y reutilización de llibros como’l que punxo en marcha nel añu 2005 la Xunta d’Andalucía. L’entós conseyeru refugó la nuesa propuesta, y dende entós tenemos unos sistemes de beques que nun son universales, que nun cubren el gastu total en llibros y quenriba se conceden a families en función de la so declaración de la renta de va dos años, resalvando qu’en dos años la situación económica d’una familia puede variar muncho, y más nuna dómina de crisis como esta. Paez que’l Gobiernu d’Asturies prima’l negociu editorial frente al drechu constitucional a la gratuidá de la Educación, porque nun esiste nenguna otra esplicación, una y bones un sistema como esti, nel que la Conseyería merca llibros cada cuatros años y dexa la so tutela a los centros educativos públicos, ta probáu qu’aforra gastu públicu al respective de los sistemes ineficaces de beques.
-Falemos de datos, ¿cuántos árboles nun se talaron gracies a esti Programa en 2011?
-Colos llibros que recoyimos hasta agora, 12.252, y los qu’apurrimos, 5.053, evitemos que 12,12 tonelaes de papel acabaren nos contenedores, y que 161 árboles nun se baltaren pa fabricar llibros nuevos. De fechu los datos son muncho más espectaculares si sumamos los llibros que llevamos recoyíos y apurríos dende 1999: 96.589 llibros recoyíos, qu’evitaron que 95,55 tonelaes de papel fueren al contenedor, y 40.424 llibros apurríos que ficieron que 1.288 árboles nun se valtaren.
-Y neuros, ¿de qué aforru tamos falando?
-El preciu de los llibros de testu varia d’un añu a otru, y nel mesmu añu, varia tamién dependiendo del nivel educativu (más baratos en Primaria y más caros en Bachilleratu) y de l’asignatura (los llibros d’idiomes suelen ser los más costosos). Calculando una media de 32 euros per llibru, l’aforru total que consiguieron les families y los estudiantes que participaron esti añu xube a 161.700 euros.
-¿Cuenten cola collaboración de los centros educativos pa promocionar el Programa dIntercambiu?
-Sí, y de fechu la implicación de los centros educativos, bien al traviés del profesoráu y del equipu directivu, o bien al traviés de les AMPAs, ye indispensable. Por muncha campaña d’espardimientu que faigamos dende’l Programa al traviés de folletos, de cartelos, de la prensa, d’Internet… la esperiencia diznos quel boca a boca” ye la meyor y la más efectiva midida d’espardimientu, y quien ta en contactu de manera directa con families y estudiantes son los centros educativos y les sos AMPAs.
-¿Cómo yel trabayu diariu nel Programa?
-El trabayu diariu, polo xeneral, ye bien mecánicu. Trés trabayadores encargámonos d’atender a les families y los estudiantes: recoyemos los llibros, damos a cambiu un vale per cada llibru, rexistrándolu na base de datos, clasificar y asitiar. Y na fase d’entrega, los usuarios vienen cola llista de llibros que precisen, busquen, y apúrren-ylos, faciendo l’intercambiu bien polos vales que yá-yos apurrimos con anterioridá, o bien por llibros que traen nesi momentu pa intercambiar. Amás intentamos qu’al traviés d’Internet y de los medios de comunicación les families y los estudiantes cunten siempres con información al rodiu de los llibros que llevamos recoyíos y apurríos, del númberu de participantes, de donaciones de centros educativos… de cómo se desenvuelven estos programes n’otres comunidaes autónomes… Intentamos facelos partes del Programa más allá de ser simples usuarios. Y de fechu hai una fase de preparación previa al entamu del Programa que nos lleva tou un mes.
-Agora entamen yá la segunda fase del Programa, ¿qué oxetivu tien esta segunda parte del Programa?
-Esta tercer fase ye un esperimentu, yá que nunca enantes lu punxéremos en marcha, y lo que buscamos ye atender la demada d’estudiantes que s’incorporen tarde al cursu pola razón que seya – matricúlense tarde, lleguen a Xixón por cambiu de residencia, etc. Estos últimos años dímonos cuenta qu’una vegada rematáu’l Programa en setiembre, bien de families y estudiantes siguíen acércandose al Conseyu a entrugar si podíen entá aportar al Programa, y al nun ser asina, quedaben nuna situación difícil, yá que tampoco les llibreríes a esos altores acutaben nin vendíen llibros de testu. Y lo que pretendemos mientres esti mes d’ochobre ye dar respuesta a esi problema.