Izquierda Xunida d’Uviéu denuncia’l pieslle de Radio Vetusta

El Coordinador Xeneral d’IX n’Uviéu, Alejandro Suárez, manifestó’l “rotundu y absolutu refugu d’IX al pieslle de Radio Vetusta”. Pal máximu responsable d’Izquierda Xunida n’Uviéu la decisión del Equipu de Gobiernu supón “un portazu inadmisible a un mediu de comunicación que, nos últimos tiempos, dio amuesa d’independencia y rigor. Esta emisora de radio foi la voz de los vecinos del conceyu, de los colectivos sociales.

“Quiero dirixir les mios primeres pallabres a los trabayadores de Radio Vetusta, a los que tresllado’l compromisu de tola organización política que represento y la nuesa solidaridá escontra esta decisión caciquil propia d’otros tiempos”, dizo Suárez.

Alejandro Suárez albidra que “l’actitú de Gabino de Lorenzo ye intolerable, compórtase como una especie de pequeñu emperador y tresforma los sos caprichos n’órdenes executives. Una ciudá nun se gobierna dende’l caciquismu. Ye imprescindible respetar les normes esenciales de la democracia. Uviéu nun ye una especie de Monopoly nel qu’esti Alcalde fai y desfai como-y peta”.

Pal Coordinador Xeneral d’IX n’Uviéu “esta decisión evidencia les prioridaes polítiques de Gabino. Pieslla Radio Vetusta pero mantién con cargu a les cuentes públiques fartódromos y pesebres de la drecha n’Uviéu. Gabino ye l’Alcalde de los fastos, en vez de prestar atención a los problemes del conceyu vístese pa la zarzuela. Ye la particular penitencia de los uviedinos”