Izquierda Xunida d’Uviéu va reclamar na Xunta Xeneral “el fin del tratu indignu al Belles Artes”

Izquierda Xunida d’Uviéu anunció ayeri que col entamu del periodu de sesiones la Xunta Xeneral del Principáu va reclamar, “por mayoría”, que se ponga fin d’una vez por toes “al inxustu tratu que recibió’l Muséu de Belles Artes d’Asturies”. Pal Coordinador d’IX d’Uviéu, Alejandro Suárez, “mientres la banda de los cuatro -Jorge Fernández León, Rosina Gómez Baeza, Erich Berger, y Vicente Álvarez Areces- mos faen la revolución cultural en Xixón a golpe de modificáu presupuestariu y con total opacidá, minusvalórase’l Muséu de Belles Artes y maltrátase”.

Pa IX, “ye terrible que los proyectos virtuales de La Llaboral nunca nun seyan puestos en cuestión y qu’agora se propongan trociar les obres del Belles Artes”. Suárez demanda “el mesmu tratu del gobiernu autonómicu pal Ayuntamientu d’Uviéu que pa otros a los que nun se-yos esixe cooperación n’otres grandes infraestructures culturales”.

Alejandro Suárez asegura qu’habrá “mayoría na Xunta pa pidir una rectificación sobre la nefasta política que fai’l gobiernu rexonal con respectu a esta xoya cultural d’Asturies que ye constantemente despreciada”.

El Grupu Parllamentariu d’IX-BA-Verdes prepara les sos propies iniciatives parllamentaries n’esti sentíu pa dempués sentase a negociaciar col restu de grupos parllamentarios una posición común y mayoritaria

.