Izquierda Xunida-BA-LV propón a PP y PSOE integrar la concertación social nel Estatutu d’Autonomía

El grupu parllamentariu d’Izquierda Xunida-Bloque por Asturies-Los Verdes treslladó ayeri al restu de los grupos parllamentarios de la Xunta Xeneral del Principáu d’Asturies una nueva propuesta en rellación cola inclusión del diálogu y la concertación social nel articuláu del nuevu Estatutu d’Autonomía d’Asturies que se ta ellaborando.

El nuevu testu suxeríu por IX tien como oxetivu, según la organización, “afalar el más ampliu alcuerdu ente toles fuercies polítiques de la Cámara pa incorporar nel nuevu Estatutu d’Autonomía la demanda de les organizaciones sociales en materia de dialogu y concertación social” . Jesús Iglesias, voceru parllamentariu d’IX-BA-Verdes y Coordinador Xeneral d’IX d’Asturies, albidra que, con esta nueva propuesta, “nenguna de les dos fuercies polítiques de la cámara, tantu los socialistes como la drecha, tienen motivos pa refugar el diálogu social que sí aprobaron n’otres comunidaes autónomes”.

Na propuesta que treslladó IX “sustitúyese nel puntu segundu de la redacción que nun entamu presentare IX, el términu “algamar” pol de “facilitar”, tratando d’evitar l’enquivocu que podría suxerir la citada redacción”. Asinamesmo, declaren dende IX, “nel nuevu testu inclúyese la creación d’un organismu estable que sirva de marcu al diálogu social, tal y como yá esiste n’otres Comunidaes Autónomes”.

El testu del artículu propuestu ye’l siguiente:

“Artículu. Diálogu y concertación social.

1.- Los sindicatos y les organizaciones empresariales contribuyen al diálogu y la concertación social, y exercen una relevante función na defensa y promoción de los intereses económicos y sociales.

Les instituciones del Principáu d’Asturies van impulsar el dialogu y la concertación social nos asuntos que-yos son de so.

2.- Una Llei de la Xunta Xeneral del Principáu d’Asturies va afitar los ámbitos y organismos nos que se tenga d’establecer la participación de los axentes sociales, asina como los conteníos mínimos y el procedimientu pa facilitar la concertación social na Comunidá Autónoma al traviés d’un organismu estable que sirva de marcu pal diálogu social.”