Izquierda Xunida apoya al sector sidreru ente’l borrador del anteproyectu de Llei del Consumu d’Alcohol

Jesús Iglesias, Coordinador Xeneral d’Izquierda Xunida d’Asturies, amuesó trres el conceyu cola directiva de l’Asociación de Llagareros del Principáu d’Asturies, el so esmolecimientu poles consecuencies que puede tener n’Asturies el borrador del anteproyectu de Llei de Consumu d’Alcohol, presentáu pol Ministeriu de Sanidá. Al so xuiciu, la nueva llei amuesa un “absolutu desconocimientu” de la realidá del consumu de sidra n’Asturies y puede crear graves perxuicios mesmo al sector agroalimentariu, del que forma parte la industria sidrera, como a les tradiciones asturianes, venceyaes profundamente al consumu de sidra en cualesquier fiesta o romería.

Jesús Iglesias abogó porque les fuerces polítiques d’Asturies sean capaces d’algamar una posición de consensu pa treslladala al Ministeriu de Sanidá y qu’esti borrador nun suponga una “grave amenaza” al consumu de sidra, que, per otru llau promovieron, al través de diferentes campañes publictaries mesmo les alministraciones autonómiques y municipales. La nueva llei, de nun sofrir modificaciones, supondría que les actuaciones del gobiernu del Principáu y de los ayuntamientos pa fomentar el consumu de sidra quedaríen nuna situación d’”illegalidá”.
“Solu dende’l desconocimientu se puede dicir que la sidra ye l’orixe de los problemes col alcohol de la mocedá asturiano. La sidra nun tien nada que ver con un botellón”, aseguró Jesús Iglesias na rueda de prensa qu’ufrió xunta a José Eloy Cortina, presidente de l’Asociación de Llagareros d’Asturies. El Coordinador Xeneral d’Izquierda Xunida considera qu’ente el consumu d’alcohol por parte de la mocedá nun se pueden adoptar posiciones d’apoloxía pero tampoco afrontalo dende’l “talibanismu de la prohibición”. Al so xuiciu l’actual redacción de borrador de la Llei de Consumu d’Alcohol solo fomenta medios de calter prohibitivu y delega nel ámbitu educativu’l consumu d’alcohol por parte de los menores, ensin facer una sola referencia al papel de los padres.
El presidente de los llagareros asturianos, José Eloy Cortina, reclamó un “frente común” de tolos partíos políticos pa que se retire esti borrador, al menos nel apartáu que se refier a la sidra. Los llagareros camienten que se trata d’una llei “desproporcionada totalmente”.