Izquierda Asturiana espulsa al so únicu conceyal y ufre un nuevu pautu al PSOE en Piloña

Nun comunicáu, redactáu en castellán, Izquierda Asturiana daba anuncia de la so decisión de suspender de militancia n’IAS a José Ángel García “Allende” por un períodu de cinco años, “lo que implica la so desvinculación absoluta d’Izquierda Asturiana” del únicu conceyal que la formación consiguió nes caberes elecciones. La decisión foi tomanda’l sábadu pasáu nel X Alcuentru Nacional d’Izquierda Asturiana (IAS) depués de “valorar l’informe de la Comisión de Garantíes y Sanciones”.

Xunto a esta decisión, la Xunta Xeneral del partíu esixe a José Ángel García “Allende” la devolución del acta de conceyal en Piloña, “por ser esi acta’l resultáu del trabayu tanto del conxuntu del partíu, del que yá nun forma parte, como de los sos socios -Asturianistes y UNIDÁ- de los que ta desvinculáu automáticamente, al afayase desvinculáu d’IAS”.

La situación n’IAS nun ye agora fácil y ye que la formación tuvo de “Prohibir a José Ángel García “Allende” falar en públicu o privadamente en nome d’Izquierda Asturiana, acutándose’l partíu’l drechu d’iniciar les acciones llegales que crea oportunes de nun facelo asina”.

Sicasí, diz IAS, la idea del partíu ye siguir col pautu col PSOE, “pa sacar al PP del ayuntamientu”, anque n’otres condiciones. Les causes alegaes pa esta espulsión son “l’incumplimientu pola so parte, de forma evidente, pública y notoria de múltiples puntos de los estatutos del partíu”, llegando esti a “vivir de la política ensin consultalo cola formación”. En casu de nun facer casu al llamáu pa que devuelva l’acta, IAS llamará al pactu antitresfugismu a PP y PSOE.