El grupu parlamentariu d’IX va llevar al plenu d’esta selmana una proposición non de llei na qu’encamienta al Gobiernu asturianu a axustar col Ministeriu d’Educación, Cultura y Deporte, y con tolos medios al so algame, la inclusión nos decretos de primaria y secundaria la especialidá del asturianu pa normalizar ya igualar a los profesores de llingua col restu del profesoráu asturianu.
Esta proposición non de llei va aldericase na sesión del vienres, ente que’l xueves, IX va apellar a la conseyera de Fomentu, Ordenación del Territoriu y Mediu Ambiente sobre’l control de la calidá nel aire na zona central d’Asturies, dada la grave esmolición que xeneró na ciudadanía’l dictame de la Unión Europea que denuncia graves insuficiencias nel cumplimientu de la normativa sobre polución y el so potencial riesgu pa la salú.