Izquierda Xunida d’Uviéu fizo pública esti día un comunicáu nel que crítica “la nula actividá nel terrenu de la normalización de la llingua asturiana del Ayuntamientu d’Uviéu dende la celebración de les elecciones municipales de mayu del 2007”. Pa la coalición les espectatives que traxera la incorporación d’un “históricu” del movimientu asturianista d’izquierdes como José Suárez Arias Cachero ciéronse “defraudaes dafechu tanto no que cinca al campu de la llingua y la cultura asturianes como a dalgunes otres de les responsabilidaes asumíes pol conceyal popular”.
Pa IX, José Suárez Arias “nun foi nos dos años trescurríos dende la so toma de posesión como conceyal a da-y el más mínimu puxu a la normalización social del asturianu nel conceyu, más allá de puntuales iniciatives d’escasu algame, como la firma de dalgún conveniu cola Academia de la LLingua Asturiana y de la meyora na dotación económica de los premios lliterarios n’asturianu convocaos añalmente pol conceyu uvieín”.
La coalición d’izquierdes tamién diz llamentar fondamente que “nun se diere nengún pasu na creación d’una oficina o serviciu municipal de normalización llingüística, y l’usu del asturinau nel Conceyu, amás allá de les ‘charlotaes’ d’un alcalde tornáu de vez en cuando n’intérprete de monólogos, ye inexistente”.