Responsables d’Izquierda Xunida treslladaron esti martes a la dirección de l’Academia de la Llingua el so total sofitu pa col idioma vernáculu, dempués del discutiniu rexistráu nes selmanes pasaes pola negativa del Partíu Popular a que pueda usase l’asturianu na Xunta Xeneral del Principáu.
Izquierda Xunida va caltener el so apueste pola protección y promoción de la llingua asturiana. El coordinador xeneral d’IX, Manuel González Orviz, la diputada Concha Masa y el miembru de la dirección nacional d’Izquierda Asturiana (IAS), Faustino Zapico, entrevistáronse güei cola presidenta y el vicepresidente de l’Academia de la Llingua, Ana María Cano González y Xosé Antón González Riañu coles mires de treslladar la disposición de la formación a defender nes instituciones y na cai l’usu del asturianu.
La visita surde dempués del discutiniu rexistráu nes selmanes pasaes pola negativa del Partíu Popular a que pueda usase l’asturianu na Xunta Xeneral del Principáu, inclusive dientro de la comisión específica qu’enceta la situación de la llingua vernácula. Pa Concha Masa, ye imprescindible tomar conciencia de la necesidá de defender la Llingua esmazcarando a los que nieguen a la población asturiana los derechos llingüísticos que sí se reconocen n’otres comunidaes autónomes.