Iniciativa pol Asturianu pide a los 942 conceyales y 78 alcaldes d’Asturies que xuren o prometan el cargu n’asturianu

Iniciativa pol Asturianu quier animar a usar l’asturianu (o’l gallego-asturianu na so zona) nel so xuramentu o promesa a los 942 conceyales y 78 alcaldes y alcaldeses que van tomar posesión de los sos cargos esti sábadu 13. Esti xestu simbólicu ye, na opinión de la organización, “una bona forma d’entamar los mandatos de les corporaciones teniendo presente la llingua propia d’Asturies”. En numberoses ocasiones conceyales y diputaos asturianos, ya inclusive esti añu una eurodiputada, yá xuraron o prometieron el so cargu n’asturianu.

Esti añu, y agora que’l compromisu cola oficialidá del asturianu tien más sofitu políticu esplícitu que nunca nes instituciones, ye un bon momento sigún Iniciativa “pa poner en práctica una de les ferramientes más útiles y más cencielles de da-y promoción al idioma, usala de forma normal ente los representantes públicos”.

Pala organización de defensa del idioma, “esti xestu tien d’acompañase dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques tresversales que-y dean presencia al asturianu en tolos ámbitos de la xestión de los concejos”.

Dende Iniciativa pol Asturianu ufren “el nuesu asesoramientu llingüísticu y animamos a tolos conceyales y alcaldes interesaos en dar pasos a favor de la normalización a ponese en contautu con nós nel nuesu corréu contautu@iniciativapolasturianu.org o bien nes redes sociales de la organización en Facebook y Twitter”.

Los testos de xuramentu y promesa pa conceyales que planteguen dende iniciativa son los que vienen darréu:

a. Xuramentu. “Xuro, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu”.

b. Promesa. “Prometo, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu”.

Testos de xuramentu o promesa p’alcaldes y alcaldeses:

“Xuro o prometo cumplir con fidelidá les obligaciones del cargu d’Alcalde/esa Presidente/a del Escelentísimu Conceyu de _______ con llealtá al Rei, y curiar y facer curiar la Constitución como Norma Fundamental del Estáu”.