Iniciativa pol Asturianu participará na xunta añal de la ONG ELEN en París

La ONG ELEN (European Language Equality Network), perteneciente al Conseyu d’Europa y que trabaya pola defensa de les llingües europees en peligru, celebrará la so primer Xunta Xeneral Añal en París esti sábadu 22 de payares, y la llingua asturiana tará representada gracies a Iniciativa pol Asturianu, organización que ye miembro d’esta ONG dende la so fundación hai yá un añu y que cuntará nesta ocasión cola participación del representante de Rellaciones Internacionales de la organización asturiana, Xosé B. Álvarez.

Sigún informa l’Asociación asturiana na so páxina web, nesta Xunta Xeneral espondráse la situación sociollingüística na que s’atopen les 36 llingües qu’hasta agora tan yá representaes na ONG y desendolcaránse les llínies a siguir pal añu 2014, amás d’abrir nuevos grupos de trabayu colos que dotar de mayor capacidá d’aición a la organización naquellos casos que seyan de mayor urxencia.

A lo cabero, Iniciativa pol Asturianu, que yá representó a la llingua asturiana hai un més nel Parllamentu Européu nuna conferencia tocante a la radiodifusión en llingües minorizaes, asegura na so web qu’aprovechará esta ocasión pa reforciar les sos rellaciones con otres organizaciones europées que trabayen pola protección y promoción d’otres llingües minoritaries y afondará na necesidá de xunir fuercies a la hora de demandar a tolos gobiernos compromisos específicos pa coles llingües en mayor peligru.