L’asociación de defensa del idioma Iniciativa pol asturianu vieno acabante abrir el plazu de matriculación p’apuntase a los nuevos cursos d’asturianu a distancia. Les inscripciones pueden facese na propia páxina web de la organización hasta’l vienres 7 de xunu.
Iniciativa pol Asturianu presentó na mañana de güei la nueva convocatoria pa los cursos d’asturianu a distancia. Los cursos tienen dos niveles (nivel básicu 1 y nivel avanzáu 2) y van tener una duración de 36 hores llectives y van celebrase dende’l 11 de xunu a finales de xunetu, o más alantre dependiendo de los díes festivos de cada conceyu y de les circunstancies de cada cursu.
El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.
El nivel II ta empobináu a persones con una conocencia más fonda del idioma, que yá ficieren dalgún cursu enantes. Les inscripciones pueden facese na propia páxina web de la organización (www.iniciativapolasturianu.org) y el plazu d’inscripción acaba el vienres 7 de xunu pa entamar la formación el martes 11 de xunu.
Los cursos a distancia tienen un llímite de 50 places, 25 por nivel. Esti númberu por nivel ye ampliable en función del total de matrícules. El preciu de la inscripción ye de 60,00 € (50,00 € pa los socios d’Iniciativa pol Asturianu) y toles condiciones de los cursos alcuéntrense na propia páxina del formulariu d’inscripción.