“Amigu Vicente, espero que nun t’enfades porque escriba n’asturianu pues fáigolo porque lo siento y tamién por solidaridá, porque la verdá ye que-y tienes puesto un cercu tan altu como’l que sufrimos na capital del Principáu que presides.” Con tan nidies y dures pallabres Gabino de Lorenzo fina una carta empobinada al Presidente del Principáu y espublizada esti domingu por La Nueva España na que s’afita l’apueste que l’alcalde d’Uviéu vien faciendo nestos caberos meses pola llingua asturiana.
Depués d’emplegar l’asturianu na presentación de la so candidatura a les elecciones municipales y de dirixir una carta n’asturianu a Antonio Trevín, Gabino de Lorenzo torna a emplegar l’asturianu pa criticar a Areces y failo amás afitando que lo que ta faciendo’l Presidente del Principáu ye “cercar” a la llingua talamente como a la capital.
Na carta, entitulada “Cuentiquinos” y espublizada esti domingu en La Nueva España, Gabino de Lorenzo, diz que “los del Ministeriu Fomento primero dicíen que si facíamos la Llosa diba entornase la iglesia de Santullano. Agora dicen que nun tienen perres y tu, que yes un señor, vas y dices que-yos les adelantes. ¡Cómo yes, entovía tan cayéndome les llárimes col to detalle!. Amigu Vicente: delles veces toos metemos algo la patuca. Pero home, ye que a vosotros nun vos da tiempu a sacala y ya tais otra vez nello. Per esi camín van llevantate’l cargu, ya toi viendo a Ovidio encaramáu nel to escañu. Déxailu fríu qu’él ye algo delicáu pa eses coses.”
Cuentiquinos